Ættarliðsskifti
Alsamt meiri vanligt
Tað er blivið vanligt hjá einum eigara at hugsa um sína fyritøku sum ogn, ið verður umsitin í eitt tíðarskeið, til tað loysir seg fíggjarliga at lata nýggjum eigara fyritøkuna. Tað er t.d. blivið meiri vanligt, at ein vinnurekandi selur sína fyritøku, um viðkomandi t.d. ynskir at royna eitt nýtt starv, at byrja nýggja fyritøku ella okkurt heilt triðja. Eisini kemur tað oftari fyri, at yngra ættarliðið í einari familju ikki ynskir at taka við leiðsluni í familjufyritøkuni, og at ein søla til triðjamann tí gerst neyðug.
At keypa aðra fyritøku
Ættarliðsskifti kann eisini merkja, at tín fyritøka yvirtekur aðra fyritøku. Tá hetta verður gjørt, er tað sjálvandi av alstórum týdningi, at tað er væl fyrireikað. Eitt krav er eisini, at tín verandi fyritøka er so sterk sum gjørligt. Tað kann taka langa tíð at samantvinna tvær fyritøkur, og tí er vert at gera tær greitt beinanvegin, um fyritøkan, ið tú ynskir at keypa, eisini fer at geva eitt nøktandi íkast um fimm til tíggju ár.
Tað kunnu vera fleiri fyrimunir við at keypa eina væl rikna fyritøku. Til dømis fært tú atgongd til ein nýggjan kundaskara og nýggjar inntøkur, samstundis sum tú kanst yvirtaka roynd starvsfólk, góða framleiðsluskipan og møguliga eisini nýggj høli. Harafturat kanst tú økja um tín marknaðarpart, um tú keypir ein kappingarneyta.
