Pensjón

Pensjón er ein spurningur um tryggleika fyri teg og familjuna - bæði nú og í framtíðini. Hjá okkum kanst tú seta tína pensjón saman, so hon hóskar til títt lív og tíni ynski fyri framtíðina.

Rætta pensjónin til tín

Uttan mun til, hvat tú velur, kunnu vit hjálpa tær at seta røttu loysnina saman, soleiðis at tú kanst byrja at spara saman til pensjónstilveruna. Tá ið pensjónsaldurin nærkast, ráðgeva vit tær um, hvussu pensjónin skal útgjaldast, og hvussu samanspælið við almennu veitingarnar verður best.

Bílegg pensjónsprát

Spar saman í góðari tíð

Annaðhvørt tú ynskir eina heildarloysn ella bert hevur tørv á einari pensjónskontu, kunnu vit hjálpa tær. Tú hevur eisini møguleika fyri at økja avkastið av tínari pensjón við at seta hana í íløgur. Les meira her

Vert at vita um pensjón

Hvør er munurin á arbeiðsmarknaðareftirløn og fólkapensjón, hvussu stovni eg mína pensjónssamansparing, og hvussu fái eg hana útgoldna? Nógvir eru spurningarnir og ivamálini, tá ið tað snýr seg um pensjón.

Niðanfyri hava vit savnað upplýsingar um nøkur av teimum viðurskiftum, sum gera seg galdandi.

Hvussu stovni eg eina pensjón?

Tú gert eina avtalu við okkum um at stovna eina pensjónssamansparing. Tú fært eitt kontunummar, sum tú skalt lata tínum arbeiðsgevara at rinda pensjónina inn á.

Hjá okkum kanst tú stovna eina vanliga eftirlønarkontu ella velja at lata okkum røkta pensjónssamansparingina fyri teg. Hetta gera vit við at seta tín pening í virðisbrøv og støðugt at hava eftirlit við og røkta tínar íløgur, soleiðis at samansparingin altíð stendur har, sum hon hevur bestu møguleikarnar fyri at geva tær eitt størri avkast.

Havi eg eina nøktandi pensjón?

Í dag er tað vanligt, at pensjónin er ein partur av avtaluni, sum tú hevur við arbeiðsgeveran. Tað vil siga, at tú hevur avtalu um, hvussu nógva løn tú fært, og hvussu nógv prosent tú fært í pensjón. Pensjónina fært tú goldna á pensjónskontuna, samstundis sum tú fært løn goldna á lønarkontuna. Er pensjónin innbygd í setanarsáttmálan, hevur tú longu eina pensjónssamansparing.

Tað er tó vert at umhugsa, um tú fært nóg mikið burturúr samansparingini, um tú rindar nóg nógv inn á samansparingina, og um tað loysir seg betur at seta pengarnar í virðisbrøv enn at hava hann á vanligari pensjónskontu. Tað er eitt gott hugskot at bíleggja eitt prát við ein av okkara pensjónsráðgevum, so tú fært innlit í allar møguleikar, og so tú á tann hátt fært lagt bestu ætlanina fyri tína pensjón.

Hvat er arbeiðsmarknaðareftirløn?

Arbeiðsmarknaðareftirløn er ein mánaðarlig upphædd, sum tú fært frá Arbeiðsmarknaðareftirlønargrunninum, tá ið tú røkkur fólkapensjónsaldur. Tú fært 1/15 av fullari arbeiðsmarknaðareftirløn fyri hvørt ár, sum tú hevur búð í Føroyum, tó í mesta lagi 15/15. Tú skalt í minsta lagi hava búð í Føroyum í 3 ár, meðan tú vart millum 15 og 67 ár. Útgjaldið verður skattað sum vanlig A-inntøka.

Hvat er fólkapensjón?

Fólkapensjón er mánaðarlig upphædd, sum tú kanst søkja um at fáa frá Almannaverkinum, tá ið tú røkkur fólkapensjónsaldur. Fólkapensjónin er samansett av einari grundupphædd, sum er líka fyri øll. Hartil kemur ein viðbót. Les meira um fólkapensjónina á heimasíðuni hjá Almannaverkinum.

Hvat er pensjón/eftirløn

Pensjón, ella eftirløn, er ein upphædd, sum tú hevur spart saman til hjá pensjónsveitara, og sum tú fært útgoldna, tá ið tú røkkur fólkapensjónsaldur, ella tá ið tú fært fólkapensjón. Upphæddin veldst um, hvussu nógv tú hevur goldið inn, meðan tú hevur spart saman. Lógarásetta kravið er minst 12%. Tú kanst tó, um tú vilt, hækka gjaldið.

Ofta er pensjónsgjaldið partur av tínum setanarsáttmála, t.v.s., at arbeiðsgevarin rindar eina upphædd inn á tína pensjónskontu, hvørja ferð tú fært løn goldna. Tú kanst stovna ein eftirlønarkontu hjá okkum.

Bílegg prát

Hvussu og nær verður samansparda pensjónin útgoldin?

Tú kanst í fyrsta lagi fáa pensjónina útgoldna, tá tú hevur rokkið pensjónsaldri, og í seinasta lagi, tá tú fært fólkapensjón goldna. Pensjónspeningur, ið er inngoldin áðrenn 2014 kann tó takast út, tá tú gerst 60 ár.

Hevur tú tína pensjónssamansparing í Føroya Banka, skalt tú boða okkum frá. Vit seta okkum síðani í samband við TAKS. Minst til at boða okkum frá minst tveir mánaðir frammanundan, útgjaldið skal byrja.

Hvussu verður peningurin á eftirlønarkontuni útgoldin?

Upphæddin verður útgoldin eftir einum ávísum leisti, tá tú nært fólkapensjónsaldur. Er samansparingin størri enn 400.000 kr., skulu minst 45% av innistandandi útgjaldast sum lívlang veiting (lívrenta), í mesta lagi 55% sum lutaútgjald í eitt tíðarskeið á minst 10 ár, og í mesta lagi 15% sum kapitalútgjald. Aðrar reglur eru galdandi fyri minni samansparingar

Tá tú nært fólkapensjónsaldur, skalt tú taka støðu til, hvussu pensjónin skal býtast.

Kann eg fáa pensjónina útgoldna áðrenn tíð?

Tín pensjónssamansparing er tín persónliga ogn. Tú hevur kortini ikki ræði á henni og kanst ikki taka hana út í úrtíð. Tó so, peningur samanspardur áðrenn 2014 kann takast út áðrenn tíð, um tú ynskir tað.

Hvat hendir við pensjónini, um eg doyggi?

Um tú doyrt, fellur samansparda pensjónsupphæddin til tann nærmasta avvarðandi, um ikki onnur avtala er gjørd.