BankNordik hevur fyrstu 9 mánaðirnar í árinum haft eina positiva gongd í afturføringum av niðurskrivingum, og tískil uppjusterar bankin nú væntanirnar til ársúrslitið fyri 2018 frá áður fráboðaðu 190-240 mió. kr. til 240-280 mió. kr.

Harumframt væntar bankin, at úrslitið áðrenn niðurskrivingar, eingangspostar, virðisjavnanir og skatt fyri roknskaparárið 2018 kemur at liggja í ovara endanum av áður fráboðaðu 160-200 mió. kr. Tó kunnu møguligar skaðatryggingarútreiðslur í fjórða ársfjórðingi fáa eina ávísa negativa ávirkan á endaliga úrslitið.

”Tað er hugaligt at kunna fráboða eina positiva gongd í inntøkum, útreiðslum og afturføringum av niðurskrivingum í triðja ársfjórðingi 2018. Nettorentuinntøkurnar eru hækkaðar hóast eitt áhaldandi trýst á rentumarginalin, og vit hava megna at hildið eitt støðugt útreiðslustøði. Høvuðsorsøkin til uppjusteringina av væntanunum til ársúrslitið fyri 2018 er tó afturføringar av niðurskrivingum, sum fyrstu 9 mánaðirnar av árinum vóru 93 mió. kr.,” sigur Árni Ellefsen, forstjóri í BankNordik.

Tað er altíð knýtt ein ávís óvissa til slíkar væntanir, og kunnu viðurskifti sum búskapargongdin, niðurskrivingar av útlánum og virðisjavnanir ávirka nevndu væntanir.

Fleiri upplýsingar verða at fáa í roknskapinum hjá BankNordik fyri triðja ársfjórðing 2018, sum verður almannakunngjørdur 1. november 2018.

Fyribils justera úrslitsuppgerð

* Ikki íroknað eingangspostar og virðisjavnan